ውዳሴ ሬዲዮ

የዓለም ሬዲዮ ቀን በየዓመቱ እንዲታወስ በዩኔስኮ ከፀደቀበት ከ2003 ዓ.ም. ጀምሮ በየዓመቱ የካቲት 6 ሬዲዮ በያንዳንዱ ማህበረሰብ ውስጥ ያለውን የጎላ ሚና አስመልክቶ የሕዝቡን ግንዛቤ ከፍ ለማድረግ ታስቦ ይውላል፡፡ ሬዲዮ ከማንኛውም መገናኛ ብዙሃን በተለየ  መልኩ፤ የዜና፣የሕዝባዊ ውይይትና የመዝናኛ መድረክ በመሆን፣ መረጃ በመስጠት፣በማነሳሳት እንዲሁም በማዝናናት ያገለግለናል፡፡ ይሁን እንጂ ሬዲዮ መረጃ ከመስጠትና ከማዝናናት የላቀም ፋይዳ አለው፡፡ ሬዲዮ በአንድ ጊዜ ብዙ ሰዎችን በተለያዩ ቦታዎች መድረስ ያስችላል፡፡ በኋላ ቀር፣በማደግ ላይ ባሉና ለተለያዩ ችግሮች ተጋላጭ የሆኑ አካባቢ የሚገኙ ማህበረሰቦችንና ምናልባትም ከውጭው ዓለም የሚገናኙበት ሌላ መንገድ የሌላቸውን ከተቀረው ዓለም ጋር በማገናኘት የመገናኛ ክፍተቱን በመሙላት ረገድ አቻ የማይገኝለት ነው፡፡ ምናልባትም በቀጥታ ለተለያዩ ሕዝቦችና ባህሎች ተደራሽ በመሆን ሬዲዮን የሚተካ መድረክ የለም ማለት ይቻላል፡፡

ሬዲዮ ሚዲያና ተግባቦትን ወደ አዲስ ምዕራፍ በማሸጋገር ላይ ከሚገኘው የዲጂታል ቴክኖሎጂ ጋር በቀላሉ ሊቀናጅ የሚችል ምቹና ተስማሚ የመገናኛ ዘዴ ነው፡፡እንደ ኢንተርኔትና ሞባይል ስልክ ያሉ አዳዲስ ቴክኖሎጂዎች ከተለመደው የመገናኛ ብዙሃን አሠራር ወጣ በሚል መልኩ ሬዲዮን ከነዚህ ቴክኖሎጂዎች ጋር በማዋሃድ በተለይም ወጣቱን ግንባር ቀደም ተጠቃሚ ከማድረጉም በላይ ሬዲዮ ተመራጭነቱን እንደያዘ እንዲቆይም አድርጓል፡፡

የኢትዮጵያን ሁኔታ ስንመለከት ሬዲዮ አሁንም ለአብዛኛው ኢትዮጵያዊ ዋንኛ የመረጃ ምንጭ ነው፡፡፤በተለይም በገጠር የሚኖረው አብዛኛው ሕዝብ ቴሌቪዥን ለመመልከትም ሆነ ጋዜጣ ለማንበብ አጋጣሚውና ዕውቀቱ ስለሌለው፤ሬዲዮ  መረጃ ለመስጠት፣ለማስተማርና ለማዝናናት ዓይነተኛ መሣሪያ ነው፡፡ የሬዲዮ በዚህ ረገድ ውጤታማ መሆን፤ ከማህበረሰቡ የቃል ተግባቦት ባህል ጋር ተያያዥነት ያለው መሆኑና ከሌሎች የመገናኛ ዘዴዎች  አንጻር በአነስተኛ ወጪ በቀላሉ ሊደረሱ የማይችሉ ቦታዎችን ማገናኘቱ ነው፡፡

የመረጃ ተደራሽነትን ክፍተት ለመሙላት በሀገሪቱ የተለያዩ አካባቢዎች የማህበረሰብ ሬዲዮ ጣቢያዎችን ማቋቋም እጅግ አስፈላጊ ነው፡፡ በዚህ ረገድ የአሜሪካ መንግሥት ሁለት የማህበረሰብ ሬዲዮ ጣቢያዎች በሀዋሳና በሐሮማያ ዩኒቨርሲቲዎች እንዲቋቋሙ ድጋፍ ያደረገ ሲሆን፤ጣቢያዎቹ  ለዩኒቨርሲቲዎቹና በዙሪያቸው ላሉ ማህበረሰቦች አገልግሎት በመስጠት ላይ ይገኛል፡፡፡፡

ስለዚህ የካቲት 6 ሁላችንም ተሰባስበን የሬዲዮ ቀንን ስናከብር፤ ዕለቱ የሬዲዮን ጠቀሜታ   የምናወድስበት ቀን ብቻ ሳይሆን፤ለወደፊቱም ያለውን እምቅ ኃይል ሥራ ላይ በማዋል መረጃ ለማሰራጨት፣ለማስተማርና ሀሳብን በነጻነት ለመግለጽ ሬዲዮን መጠቀም እንደሚኖርብን የምናረጋግጥበትም ቀን ሊሆን ይገባል እንላለን!